Heb 12 | DOB | STEP | Ga 'enega toemisao yaudi galewega siduneduneyeda, be 'ilobweneda yage mwaudi 'edega tada gisinedi, be 'enega tada pili waiwai epili nina 'ana 'eda 'enega, ta wate bubuna to'umalina nidi sigiyagiyaida tada gisinedi.

Hebrews 12

Toolopa'ala manuna

1 Ga 'enega toemisao yaudi galewega siduneduneyeda, be 'ilobweneda yage mwaudi 'edega tada gisinedi, be 'enega tada pili waiwai epili nina 'ana 'eda 'enega, ta wate bubuna to'umalina nidi sigiyagiyaida tada gisinedi. 2 Ta wate Yesu 'enaya tada sanalaga ataya, manuna Yesu nina 'ida emisa 'ana 'ebe e'ale ta 'ana 'ebe losalowa. Tuta nina Yesu bale'uya 'imiyami 'imwalatonina 'aene ma'etamo 'ebe gwausowala sinabwana 'ilobai, 'enega kelose 'ina 'elouya 'i'alama'i'itanena, omayamaya wate nigeya manuna 'inuwanuwa, ga 'ebe losalowa 'enaya 'itu'e galewaya ga Yaubada 'atainega 'imiyatowa.

3 Yesu nina wanuwa'i'isi 'aene 'i'alama'i'ita sinabwana toto'umalidi 'idi etalauwala 'enega, be 'enega 'omi wate nadigega 'aene geya'abo walo'ame'ame, nai waneeneta. 4 Ta 'omi tuta nina bubuna to'umalina walosaiyena 'imi miyamwau gidalina tuga, ta tomota nigeya siloeloemwawasimi Yesu nadigega. 5 Nai guguya wanuwa pupulena, guguya nina 'ena 'i'awa natunemi, 'igwae, “Natugu, 'abo tuta nina 'Inapwana 'iemata sabuyeyo sabi giepaepaluyeyo, gete manuna 'uda nuwanuwa ta geya'abo wate 'uneeneta. 6 Manuna 'abo yaita Yaubada 'i'awa natunena ta 'iobobomena, 'ilobwenena be sapi 'ida loba 'ina loegesiyao manudi be 'enega 'ida bobo'ana limana.” 7 'Enega 'ilobwenemi be sapi Yaubada 'enega manuna wada 'alama'i'ita, manuna tama maibo'adi natudiyao sisapidi sabi giepaepaluyedi. 8 'Enega Yaubada wate maibo'ada 'isapida, ta 'abo yaita 'oyo Yaubada geya'abo 'isapisapiyo nate manuna 'oyo nigeya natu 'ai'ailina, ta 'aene 'oyo 'ebweu pesiyeda. 9 Wanuwa'i'isi 'abo tamadao bale'uya sisapida 'enega ta'amayabedi, ta 'ilobweneda be yaluyaluwada tamadi galewaya tada 'amayabe be 'enega yawasida bobo'ana 'i'ebwa'eda. 10 Manuna tamadao bale'uya taudimo 'idi nuwanuwa 'ediyega sisapida ta sigiepaepaluyeda tuta kukupana namo manuna, ta Yaubada esi 'isapisapida 'ada lema manuna be 'aene 'igie'esaseda be tada bubuna bobo'ana tauna 'ina bubuna nadigega. 11 Ona'ai'aila, tuta nina 'abo 'inapwana 'ebweu 'isapida ta'elouya sinabwana ta geya'abo tagwaugwausowala, ta esi 'abo 'igiepaepaluyeda 'etamo uwana bobo'ana taloba, nate bubuna palupaluna be miya siwalowa. 12 'Enega 'imi neneta wada pilisine be waewaiwai, 13 be 'imi 'eda wada giepaepaluyedi, be 'abo tolopegoi sitautauya, geya'abo 'ena sibe'ube'u ta esi 'idi lopegoi nidi sida bobo'ana be taudi wate sida ewaiwai. 14 Wada toowaiwai be wada miya siwalowa tomota ma'emiyao, ta wate wada toowaiwai be 'imi bubuna 'ida bobo'ana maibo'ana, manuna 'abo yaita nigeya 'ina bubuna bobo'ana geya'abo sa'i 'Inapwana 'i'ita'ita. 15 Wa'ita'i'isimi 'abona nai 'emiyega yaita Yaubada 'ina oboboma geya'abo 'ilobaloba. Ta geya'abo 'ebweu yaita 'emiyega 'ie'ale be 'ibubuna to'umalina, 'abona nai yaudi simuliye.

16 Geya'abo waloeloelata, ta wate geya'abo Yaubada 'ina oboboma waguiguitoyase, nadigega Iso lowa Yaubada 'ina onaupaupa tauna manuna ta 'ipelena tasina 'enaya, 'ana maisa 'e'ai 'ebweuna namo. 17 Ta wanuwa'i'isi 'aene tuta muliyega Iso onaupaupa nina 'inuwena, ga manuna 'idedoi, ta nigeya sawesawenaya be sisa'u gelasa limana, manuna ni'atu tasina 'i'ewena.

18 Gete tuga wamai Yaubada 'ina senaya, nigeya nadigega lowa Mosese be me Isileli ma'enao sitauya ga silotoona 'oya Sainai 'enaya, manuna 'awe sabelulu be guguyoi sinabwana be umauma be kwau sinabwana 19 be yoguli 'enana be 'atuwa tai 'enana 'oya nina 'enaya, 'enega me Isileli simatauta sinabwana, ta sisidasida be 'aene geya'abo 'enana nina sida noono lima, 20 manuna loina nina sinonona 'igiematautedi 'aene, “Geya'abo 'ebweu to'ase 'oya gete 'igitogitoo, ta 'aene 'abo 'ebweu yobai 'imama 'oya nina 'enaya, gulewega sida loibwaibwa be 'ida mwawasa.” 21 Ona'ai'aila, 'oya nina 'ebe matauta sinabwana, ga Mosese tauna wate 'imatauta, ga 'isimana, 'igwae, “'Igu matauta 'enega ni'atu yadededela.”

22 Ta 'omi esiya ni'atu wamai Sayoni 'oyana 'enaya, nate Yaubada tauna mayawasina 'ina 'asa, Yelusalema nina galewaya 'ena, aniloseyao yau wawasae simiyami ta sigwaugwausowala 'atuwa sagali 'enaya, 23 ta wate wamai tomota nidi Yaubada 'i'awa natunedi ga 'adi esanao galewaya 'i'etoladidi 'ediya, ta wate tauna 'abo'ada be yage maibo'ana 'ada toloina, nate Yaubada 'ena, ta wate taudi yaluyaluwadi Yaubada 'igiepaepaluyedi 'ediya, 24 ta wate Yesu 'ena, tauna loina auwauna 'ana to'ebwaya nina ga lalana 'ana loseuseula 'enega 'i'etoseyeda, ta nigeya nadigega Ebeli lalana, manuna nate 'ebe esilae.

25 'Enega wa'ita'i'isimi be tauna galewega 'ionaona 'edaya geya'abo 'enana waguiguitoyase. Manuna lowa tomota 'aidi bale'uya Mosese 'ina guguya 'ediya siguitoyasena ga mwau silobena. Ta gete tuga Yaubada galewega 'iloguloguguya 'edaya, 'enega 'abo 'enana taguitoyasei mwau sinabwa wawasae taloba.

26 Manuna 'enanana lowa bale'u 'igie loniuyena, ta gete tuga ni'atu 'ionaupaupa 'aene, “'Etamo bale'u be galewa wate yada gieloniuyedi ma'ebweuna tuga.” 27 Gete nadigega 'ieona'esa manuna yage mwelumweluluidi 'ida gieloniuyedi, be 'enega yage nidi nigeya sipa'apa'ala sida be'u, be yage pa'alidi sida toolo ataya. 28 Gete 'ida sena auwauna 'ena talugulugu, waiwaina ta miyamiya atayana, 'enega 'ilobweneda be Yaubada 'enaya tada lokagutoki, be tada lotapwalolo to'ase 'ina nuwanuwa 'ana lobwene nadigega, be wate tada 'amayabei ma ida matauta, 29 manuna 'ida Yaubada nina 'awe sabelulu 'atuwa.